(Видео) Градоначалник во Франција застана меѓу полицијата и демонстрантите, полицијата го погоди со солзавец

Бали Багајоко, градоначалникот на францускиот град Сен Дени во близина на Париз, бил погоден со солзавец додека вчера се обидувал да ги смири тензиите меѓу интервентната полиција и младите демонстранти. Багајоко застанал меѓу двете страни за време на големиот марш во Париз, организиран поради лошите услови во училиштата.

Снимките од настанот го покажуваат градоначалникот во полицискиот кордон меѓу демонстрантите и полицијата, а потоа во облак солзавец што полицијата го испукала кон него и кон присутните. Инцидентот се случил на денот кога низ Франција протестирале повеќе од 266.000 луѓе во знак на поддршка на движењето на учениците и студентите. Според официјалните проценки, само во Париз на улиците имало околу 56.000 луѓе.

Багајоко, член на левичарската партија Непокорена Франција (LFI), по инцидентот ја обвини полицијата за примена на „целосно непропорционална“ сила.

— реклама —

„Сведочев на целосно непропорционална употреба на сила против младите луѓе кои само бараат да бидат слушнати“, изјавил тој.

„Го повикувам министерот за внатрешни работи: инструкциите мора итно да се преиспитаат пред да дојде до трагедија“, додал Багајоко.

— реклама —

Тој објаснил дека на протестот бил за да ги заштити младите и да се обиде да ја смири ситуацијата.

„Денес, во центарот на протестот, бев таму каде што градоначалникот и треба да биде: со нашата младина, за да ја заштитам и да ги смирам тензиите. А токму тие млади луѓе околу мене формираа човечки штит. Спонтано. Братски“, рекол Багајоко.

Ученичките протести започнале во средината на септември во едно училиште во париското предградие Кретeј поради преполните паралелки, недостигот од наставници и лошата состојба на училишните згради.

— реклама —

Движењето брзо се проширило и, според податоците на Министерството за образование, до почетокот на октомври опфатило повеќе од 1.000 средни училишта, односно секое четврто училиште во земјата. Во меѓувреме, поддршка за учениците дале професори, родители и синдикати, а на протестите им се придружиле и студенти.

Протестите во вторникот биле меѓу најмасовните, а полицијата во Париз и Лион употребила солзавец и водени топови.

Владата се соочува со сè поголеми критики поради постапувањето на полицијата, особено по тешките повреди на демонстрантите. Во Ленс, еден ученик ја загубил раката откако наводно подигнал полициска граната, додека друг во Тур останал без око.

— реклама —

Багајоко и покрај сè ги повикал младите да не се откажуваат.

„Вашите барања се праведни. Продолжете да се организирате и нека се слушне вашиот глас. Но, не паѓајте на провокации. Останете обединети и ненасилни“, им порачал тој.

Тој додал: „Со својата бројност и решителност ќе ја принудите владата да ве слушне.“