Градоначалникот на Скопје, Орце Ѓорѓиевски, на денешната прес-конференција уверуваше дека водата од градскиот водоснабдителен систем е безбедна за пиење, повикувајќи ги граѓаните да не подлегнуваат на информациите што создаваат паника.
Како доказ за своето тврдење, Ѓорѓиевски пред новинарите се напи вода директно од чаша наполнета од чешма.
„Да знаете дека во Скопје водата е безбедна и дека скопјани пијат безбедна вода“, порача градоначалникот.
Тој посочи дека квалитетот на водата се контролира секојдневно, при што лабораторијата врши испитувања на 36 мерни места низ Скопје.
Ѓорѓиевски апелираше до граѓаните да не создаваат и шират паника поради непроверени информации.
„Ова е обична вода од чешма. Да знаат скопјани дека имаме најдобра и најквалитетна вода“, рече тој.
Градоначалникот додаде дека и тој лично, како и неговото семејство, вклучително и неговиот син, ја консумираат водата од скопскиот водоснабдителен систем.
„Да бидат спокојни скопјани, имаат кој да се грижи за нив“, порача Ѓорѓиевски.
