(Видео) Илјадници се обидуваат да влезат во Шпанија, најмалку 18 загинати

Илјадници мигранти во текот на ноќта се собраа во мароканскиот пограничен град Фнидек во обид да влезат во шпанската енклава Сеута, создавајќи силен притисок врз границата и покрај засилените безбедносни мерки.

Според шпанската државна телевизија ТВЕ, во текот на четвртокот меѓу 2.000 и 3.000 лица успеале да влезат во Сеута, а жителите на Фнидек тврдат дека најголемиот дел од нив ја преминале границата пред пладне.

Агенцијата ЕФЕ објави дека најмалку 18 лица го загубиле животот за време на мигрантската криза. Мароканските власти сè уште немаат објавено официјални податоци за бројот на жртвите и за вкупниот број обиди за нелегално преминување на границата.

— реклама —

Како одговор на новиот мигрантски бран, шпанската влада испрати дополнителни армиски и полициски сили во Сеута. Заедно со Мелила, оваа шпанска енклава претставува единствена копнена граница меѓу Европската Унија и Африка и со години е една од главните рути за мигрантите кои се обидуваат да стигнат до Европа.

Кризата се прошири и во Мелила, каде што поради обидите за нелегален влез беше затворен граничниот премин Бени Ензар. Дополнителни шпански безбедносни сили се распоредени и на други делови од границата.

Иако официјалните премини се затворени, групи мигранти се движеле долж брегот барајќи начин да ја заобиколат граничната ограда, а дел од нив се подготвувале да допливаат до Сеута. Во текот на ноќта многумина купувале гуми за пливање и друга опрема за да се обидат да стигнат до енклавата по море.

— реклама —

На мароканската страна од границата безбедносните сили употребиле водени топови за да ги оттурнат насобраните луѓе, додека во близина на граничниот премин останале изгорен автобус и уште седум возила оштетени во судирите што избувнале за време на полициската интервенција.

Мароко дополнително ги засили контролите на патиштата, железничките станици и пограничните области во обид да го намали движењето на мигрантите кон северот на земјата. Сепак, илјадници луѓе, претежно млади, и натаму се собираат во околината на Фнидек. Меѓу нив има и жени, деца, како и мигранти од земјите во Супсахарска Африка.

— реклама —

Според локалните жители, ширењето на гласини дека Шпанија овозможила влез без документи дополнително го поттикнало масовното движење кон Сеута. Истовремено, по морски пат продолжиле обидите за пристигнување до енклавата.

Локалните медиуми предупредуваат дека сегашната мигрантска криза би можела да ги надмине настаните од 2021 година, кога околу 10.000 мигранти влегоа во Сеута за време на дипломатските тензии меѓу Шпанија и Мароко.

Во меѓувреме, Шпанија и Мароко постигнаа договор за забрзано враќање на лицата кои нелегално ќе влезат на шпанска територија, но досега тоа не придонело за намалување на притисокот врз границата.

Шпанскиот премиер Педро Санчез денеска треба да ја посети Сеута заедно со министерот за внатрешни работи Фернандо Гранде-Марласка, со цел да ја проценат состојбата и да ги координираат натамошните мерки.

Во меѓувреме, претседателот на Сеута, Хуан Хесус Вивас, повторно побара од централната власт во Мадрид да прогласи вонредна состојба, оценувајќи дека досегашниот одговор на Владата не е доволен. Тој ја спомена и неодамнешната програма на шпанската влада за легализација на статусот на околу 500.000 нелегални мигранти, за која, според достапните информации, интересот бил двојно поголем од предвидениот број.