Американскиот претседател Доналд Трамп го прекина интервјуто за емисијата „Meet the Press“ на телевизијата NBC по жестока расправија со водителката Кристен Велкер околу неговите тврдења дека претседателските избори во 2020 година биле украдени.
Тензиите се зголемиле кога Велкер побарала докази за неговите наводи дека изборите биле наместени, како и за обвинувањата поврзани со изборниот процес во Калифорнија.
„Вие сте еднострана и корумпирана мрежа. Да завршиме, доста ми е“, ѝ рекол Трамп на водителката пред да го прекине разговорот.
Иако новинарката се обидела да го убеди да продолжи со интервјуто, американскиот претседател останал на својата одлука, посочувајќи дека веќе одвоил доволно време за разговорот.
Според NBC, интервјуто станало особено напнато кога се отворила темата за предложениот фонд за обештетување на лица кои, според Трамп, биле жртви на политички мотивирани истраги и судски постапки.
Во текот на дискусијата, Трамп повторно се навратил на изборите во 2020 година, по што дошло до нова расправија со водителката.
По емитувањето на интервјуто, Велкер откри дека подоцна повторно разговарала со Трамп и дека тој се согласил во иднина да даде уште едно интервју, иако засега не е познато кога би се реализирало.
