(Видео) Иран тврди дека заробил американски подводен дрон во Ормускиот Теснец

Иранската Исламска револуционерна гарда соопшти дека запленила американско беспилотно подводно летало во Ормускиот Теснец, во услови на зголемени тензии околу овој важен поморски премин.

Според соопштението објавено од иранската државна телевизија ИРИБ, припадници на морнарицата на Револуционерната гарда заплениле подводен дрон „Remus 600“. Од гардата наведуваат дека леталото се наоѓа „во рацете на нивните експерти“ заради прибирање информации.

— реклама —

„Морнарицата на Исламската револуционерна гарда цврсто потврдува дека Ормускиот Теснец е затворен и дека решително и континуирано постапуваме против опасни маневри и неовластено минување низ теснецот“, се наведува во соопштението.

— реклама —

Објавувањето на информацијата доаѓа во период на интензивни дипломатски напори за повторно отворање на Ормускиот Теснец, кој Техеран го затвори како одговор на американско-израелските напади во февруари и поморската блокада на Иран.

Ова не е прв случај во последниот период Иран да тврди дека запленил американско подводно беспилотно летало. На почетокот на септември Револуционерната гарда соопшти дека запленила американски дрон „Anduril Dive-LD“.

— реклама —

Неколку недели подоцна се појавија информации дека Иран започнал да го анализира леталото со цел да развие сопствена верзија.

Најновиот случај претставува нов инцидент во веќе исклучително напнатата ситуација околу Ормускиот Теснец, еден од најважните поморски премини за глобалната трговија со енергенси.