Скопје синоќа беше центар на голема музичка вечер посветена на 35 години независност, со легендарниот шпански тенор Хозе Карерас како главна ѕвезда. Пред преполниот плоштад „Македонија“, Карерас настапи заедно со Македонската филхармонија и приреди концерт исполнет со извонредни вокални изведби и силни емоции.
Концертот, организиран од „Авалон“ и Владата, го збогатија и некои од најпознатите македонски музички имиња. Македонската филхармонија настапи под диригентската палка на Сашо Татарчевски, со оркестрации на Николче Мицевски.
Македонските изведувачи приредија повеќе настапи, а дел од песните оставија особен впечаток кај публиката. Сузана Спасовска со „Земјо македонска“ ја крена атмосферата на плоштадот, Маја Оџаклиевска со „Македонско девојче“ предизвика силни емоции, додека Каролина ја отпеа „Ако згрешам нека изгорам“.
Посебно емотивен настап имаше и Калиопи, која со својот препознатлив вокал ја исполни сцената со силна енергија и љубов кон Македонија. Заедно со илјадници Македонци ја пееше „Бисер балкански“. Публиката уживаше и во настапот на Влатко Стефановски и неговата безвременска „Gipsy Song“.
Плоштадот „Македонија“ беше исполнет до последното место, а музичката програма со Карерас и македонските музички ѕвезди приреди вечер која долго ќе се памети во одбележувањето на 35 години независност.
