Најмалку 12 лица загинаа, а повеќе од 200 се повредени во силниот земјотрес со јачина од 7,8 степени според Рихтеровата скала, што денеска ги погоди Филипините, јавува Би-Би-Си, повикувајќи се на информации од локалната полиција.
Според првичните процени, оштетени се најмалку 37 објекти, претежно деловни и трговски згради, од кои дел се целосно уништени.
По силниот потрес беше издадено предупредување за опасност од цунами за Филипините и Индонезија. Во меѓувреме, предупредувањето во Индонезија е укинато, додека на Филипините сè уште останува во сила. Во двете земји се регистрирани бранови од цунами, високи до 80 сантиметри.
Според Европско-медитеранскиот сеизмолошки центар, епицентарот на земјотресот бил во морето, на длабочина од 45 километри.
Очевидци чии сведоштва се објавени на страницата на Центарот наведуваат дека потресот бил исклучително силен и траел подолго време, предизвикувајќи паника меѓу населението.
По главниот земјотрес биле регистрирани уште шест последователни потреси со јачина од 5,8 до 6,5 степени според Рихтеровата скала, што дополнително ја зголемило загриженоста кај жителите на погодените подрачја.
