(Видео) Кочани со тишина и 40 бели балони им оддаде почит на жртвите од Кран-Монтана

Со тишина, запалени свеќи и 40 бели балони испратени кон небото, Кочани попладнево им оддаде почит на 40-те млади животи загинати во пожарот во швајцарскиот ски-центар Кран-Монтана. Мирниот собир, организиран под мотото „Два града – иста болка“, обедини граѓани од сите генерации во заедничко сочувство и солидарност.

— реклама —

View this post on Instagram

Без говори и без транспаренти, присутните стоеја во тивка, достоинствена атмосфера, испраќајќи порака дека болката не познава граници. Белите балони, пуштени во небото, симболично ја означија младоста што прерано згасна.

— реклама —

Особено емотивен беше моментот кога на собирот присуствуваа и родители на децата загинати во пожарот во дискотеката „Пулс“ во Кочани. Тие порачаа дека ја препознаваат болката на семејствата во Швајцарија, нагласувајќи дека загубата на дете е иста, без разлика каде се случила трагедијата.

— реклама —

„Понекогаш тишината зборува повеќе од зборовите“, беше пораката што ненаметливо ја одбележа целата вечер.

Собирот помина мирно и достоинствено, како симболичен чин на заедништво меѓу два града поврзани од трагедии што оставија длабоки и трајни лузни.

— реклама —