На прес-конференција, портпаролката и членка на Извршниот одбор на СДСМ, Богданка Кузеска обвини дека Владата предводена од Христијан Мицкоски преку плановите за нови рудници, антимон и центри за податоци ја става Македонија во функција на, како што велат од партијата, туѓи бизнис интереси.
Кузеска посочи дека се планирани пет нови рудници – Иловица–Штука, Казандол, Плавица, Кадиица и Луке, како и геолошки ископи на планината Кожув.
Кузеска се осврна и на најавениот рудник за антимон, посочувајќи дека станува збор за метал што се користи во воената индустрија. Таа праша колкави се резервите, каде се наоѓаат, кој ќе врши ископ и што ќе остане за селата во близина на јаловиштето.
Од СДСМ ги поврзаа плановите за антимон со, како што тврдат, состаноците на Мицкоски со продавачи на оружје во САД, при што обвинија дека зад проектите стојат интереси поврзани со провизии и профити.
Партијата изнесе критики и за центрите за податоци, тврдејќи дека станува збор за „иста шема“ со пет-шест фирми кои, според нив, веќе се договорени.
Кузеска ја критикуваше и економската политика на Владата, тврдејќи дека по две и пол години нема економски резултати, додека „кошничката“ достигнала 90 илјади денари и граѓаните едвај врзуваат крај со крај.
Од СДСМ обвинија и дека ЕСМ тоне, додека државата се задолжува, а преку лицата и компаниите наведени на прес-конференцијата се тераат, како што тврдат, бизниси со струја и броила.
Според Кузеска, приоритетите на Мицкоски се бизнисот, провизиите и профитите, додека водата и земјата се ставаат во ризик на штета на здравјето на граѓаните.
СДСМ најави дека ќе се спротивстави на плановите за рудниците и дека заедно со граѓаните ќе го блокира планот.
„Македонија не е на продажба“, порача Кузеска.
