На денешната прес-конференција, портпаролката Богданка Кузеска обвини дека по вчерашното невреме во Скопје дошло до сериозен инцидент на Клиниката за онкологија, при што, според партијата, биле поплавени делови од установата, исклучени апаратите за радиотерапија, а вода навлегла и во просториите каде што се спроведува терапија со радиоактивен јод.
Кузеска изјави дека, според информациите со кои располагаат, не станува збор за дождовница, туку за излевање на канализација, што, како што рече, претставува сериозен биолошки и радијациски ризик за пациентите и медицинскиот персонал.
Од СДСМ тврдат дека единствениот изолиран бункер со оловна заштита, наменет за пациенти кои примаат терапија со радиоактивен јод, бил целосно поплавен и дека Клиниката нема друга алтернативна просторија за оваа намена.
Партијата побара итни одговори од раководството на Клиниката за онкологија и од Дирекцијата за радијациона заштита, поставувајќи прашања дали е реагирано навреме, каде се сместени пациентите кои примиле јодна терапија, дали постои ризик од контаминација со радиоактивен јод надвор од предвидените простории, дали е спроведена деконтаминација и дали се загрозени безбедноста на персоналот и пациентите.
Од СДСМ бараат институциите итно да ја информираат јавноста за состојбата, да преземат мерки за надминување на проблемот и да утврдат одговорност доколку се констатираат пропусти.
