Од СДСМ денеска обвинија дека против партијата и нејзиниот претседател Венко Филипче се води координирана политичка и медиумска кампања. На прес-конференција, портпаролката и членка на Извршниот одбор на СДСМ, Богданка Кузеска, изнесе низа обвинувања кон власта и политички субјекти.
Кузеска повтори дел од тврдењата што СДСМ ги објави претходно во врска со наводното лобирање во САД, договори поврзани со рударски проекти и финансирање на политички и медиумски активности.
Таа рече дека СДСМ претходно објавил документи за ангажман на приватна компанија за лобирање во САД, за која, како што тврдеше, биле предвидени 1,56 милиони долари годишно. Кузеска упати и обвинувања за лица поврзани со оружје и корупција.
Во своето обраќање таа се осврна и на рударските проекти „Иливица–Штука“ и „Казан Дол“, како и на антимонот, при што обвини дека станува збор за „распродавање на земјата“.
Според Кузеска, наместо одговор на овие прашања, следела кампања насочена кон претседателот на СДСМ, Венко Филипче. Таа ја обвини власта дека зад кампањата стојат различни политички, медиумски и онлајн структури.
Кузеска во тој контекст спомена и поддршка од поранешни функционери на ЗНАМ за новата „Платформа ЗНАМ 2.0“, како и тврдења за влијание врз медиуми и социјалните мрежи.
„Готово е со дефокусот, со лагите и со црните кампањи“, порача Кузеска, додавајќи дека, според неа, следува период во кој ќе се бараат одговори и одговорност.
Таа најави дека СДСМ ќе продолжи со политичките активности и порача дека партијата ќе се бори „за власта да се врати во рацете на граѓаните“.
