(Видео) Кузеска: Обвинителство мора да отвори истрага за лотото на Мицкоски и трошењето 5,5 милиони евра

На прес-конференција, портпаролката и членка на Извршниот одбор на СДСМ, Богданка Кузеска, побара Јавното обвинителство веднаш да отвори истрага за начинот на кој биле донесени одлуките и потрошени 5,5 милиони евра за прославата на независноста, организирана и финансирана преку Државната лотарија.

Кузеска обвини дека од граѓаните се кријат документи, одлуки, анекси, фактури и податоци за исплатите, како и информациите за тоа каде завршиле народните пари.

Кузеска побара обвинителството да ја обезбеди целокупната документација и да ја стави на увид на јавноста, со цел да се утврди до последен денар како биле потрошени средствата.

— реклама —

Од СДСМ поставуваат прашање во кое својство Владата ѝ наложила на Државната лотарија да ја организира и финансира прославата. Доколку Владата постапувала како претставник на државата како акционер, прашуваат каде е одлуката на Собранието на акционери.

Партијата бара да се утврди кој орган одобрил трошење на повеќе од 300 милиони денари, на која седница била донесена одлуката, кој гласал и врз која законска основа.

— реклама —

Кузеска посочи и на јавниот повик за организација на настанот, кој, според неа, траел само пет работни дена и на кој пристигнала само една понуда. Повикот завршил на 8 мај, а три дена подоцна Владата веќе го најавила настапот на Дејвид Гета.

Од СДСМ бараат да се утврди колку чинел настапот на Гета, кога бил договорен и кога бил исплатен, како и кои домашни и странски компании добиле средства.

Дополнително, партијата прашува колку заработила компанијата „Стардаст“, односно „Авалон“, и на кој начин биле извршувани исплатите додека компанијата имала блокирана сметка.

— реклама —

СДСМ бара од надлежните институции да утврдат и каде завршиле околу 1,75 милиони денари од продадените билети и дали за нив бил платен данок.

Кузеска оцени дека има премногу, како што рече, „матни работи“ и скриени информации во врска со потрошените 5,5 милиони евра, за кои премиерот Христијан Мицкоски претходно изјавувал дека прославата чинела „нула денари“.

— реклама —

СДСМ ги повика Јавното обвинителство, Државната комисија за спречување на корупцијата и Државниот завод за ревизија да постапат и да утврдат каде завршил секој потрошен денар.

„Народот не е ниту „талог“, ниту „идиот“. Не може постојано да го лажете и да ги криете одговорите за неговите пари“, порача Кузеска, додавајќи дека, според СДСМ, мора да има одговорност.