Либерално-демократската партија (ЛДП), по последните случаи на насилство во Гостивар и инцидентите со употреба на огнено оружје на свадбени веселби, предложи формирање семејни центри во секоја општина како мерка за превенција на врсничкото насилство и други општествени проблеми.
Во видео-објава на социјалните мрежи, претседателката на ЛДП и пратеничка Моника Зајкова истакна дека во овие центри би работеле социолози, психолози, социјални работници и семејни терапевти, кои ќе обезбедуваат поддршка и за децата и за нивните родители.
Според Зајкова, центрите би нуделе советување, психосоцијална поддршка и едукација, со цел навремено да се препознаат и спречат проблемите.
Членот на Извршниот одбор на ЛДП, Бобан Јанкоски, оцени дека општеството премалку вложува во превенција, а реагира дури кога проблемите ќе станат сериозни.
„Секој ден гледаме видеа од врсничко насилство. Овие деца не се родени насилници, тие се производ на систем кој бавно реагира, на општество кое ги занемарува семејството, воспитувањето и менталното здравје“, истакнува Јанкоски во видео-објавата.
