Легендарниот шпански тенор Хозе Карерас, еден од славните „Тројца тенори“ заедно со Лучано Павароти и Пласидо Доминго, синоќа настапи пред македонската публика на плоштадот „Македонија“ по повод 35 години независност на Македонија.
Карерас, кој зад себе има децениска меѓународна кариера и настапи на најголемите светски сцени, настапи заедно со Македонската филхармонија и дел од најпознатите македонски музички имиња.
Посебен момент беше заедничката изведба на „Едно име имаме“, во која на сцената се приклучија Влатко Стефановски на гитара, Каролина Гочева, Калиопи, Ана Дурловски, Игор Дурловски, Наум Петрески и Сузана Спасовска.
Полн плоштад „Македонија“ ја проследи оваа несекојдневна музичка изведба, која беше еден од највпечатливите моменти од концертот по повод 35 години независност на Македонија.
