(Видео) Левица: Се краде од студентите за да им се даде на пензионерите - ДПМНЕ ја плаќа својата гласачка машинерија со парите на младите

Левица преку видео обраќање обвинува дека студентите веќе три години не го добиваат износот на субвенционираниот студентски оброк што, според партијата, законски требало да биде усогласен со инфлацијата. Од партијата велат дека и покрај нивното јавно укажување, Владата и Министерството за образование не дале одговор на наводите.

Според Левица, износот на субвенционираниот студентски оброк останал 140 денари, иако соодветно на растот на цените денес би требало да изнесува околу 165 денари. Оттаму пресметуваат дека студентите месечно добиваат околу 650 денари помалку од износот што, според нив, би требало да им следува.

— реклама —

Партијата тврди дека, земајќи го предвид бројот на корисници и периодот во кој не било извршено усогласувањето, вкупната разлика достигнува околу 6,5 милиони евра.

Од Левица нагласуваат дека не го оспоруваат зголемувањето на пензиите, туку начинот на кој, како што велат, Владата ја креира социјалната политика.

— реклама —

„Проблемот не е што едните добиваат повеќе, туку што другите противзаконски добиваат помалку“, наведуваат од партијата, обвинувајќи ја власта дека носи одлуки според политичката исплатливост.

Според нив, особено загрижувачки е што ваквата политика се спроведува во услови кога голем број млади ја напуштаат државата. Од Левица прашуваат како Владата планира да ги задржи младите во земјава ако, како што тврдат, не им се обезбедуваат ниту законски предвидените права поврзани со студентскиот стандард.

— реклама —

Левица најавува дека ќе поднесе законска измена со која би се обезбедило износот на субвенционираниот студентски оброк задолжително да се усогласува со инфлацијата.

Од партијата додаваат дека со евентуалното зголемување на износот не треба да заврши прашањето, бидејќи, според нив, останува одговорноста за тригодишното неусогласување.

— реклама —

„6,5 милиони евра е мерка за односот на оваа власт кон младите“, порачаа од Левица, обвинувајќи ја Владата дека студентите ги ставила во втор план.