(Видео) Масовни украински напади врз Русија, погодени нафтен терминал и центар за податоци

Украинските напади врз Русија предизвикаа пожар на терминал за извоз на нафта во Санкт Петербург, додека Киев лансирал повеќе од 1.000 беспилотни летала кон руска територија. Станува збор за еден од најмасовните воздушни напади од почетокот на војната, во период на зголемени тензии меѓу Украина и Вашингтон, по критиките на американскиот претседател Доналд Трамп за украинските удари врз руската нафтена инфраструктура, објави „Њујорк пост“.

Локалниот гувернер Александар Беглов соопшти дека во нападите загинало едно лице, а петмина биле повредени. Пожари избиле на нафтениот терминал и во градското складиште за нафта „Ручи“. Мети на нападите биле и логистичкиот центар на рускиот трговец „Озон“ и центарот за податоци на технолошката компанија „ВК“, што го потврдиле двете компании.

— реклама —

Руското Министерство за одбрана соопшти дека руските сили уништиле 1.015 украински беспилотни летала над 15 руски региони, како и над анектираниот полуостров Крим и Црното Море. Портпаролот на Кремљ, Дмитриј Песков, изјави за руската државна новинска агенција ТАСС дека Киев се спротивставува на руската инвазија, но дека Украина не може да го промени „текот на настаните“.

Во меѓувреме, во два руски напада врз градот Запорожје, на југот на Украина, загинала една жена, а најмалку две лица биле повредени, меѓу кои и шестгодишно девојче. Началникот на регионалната воена управа, Михајло Семикин, соопшти дека биле оштетени две станбени згради, 18 автомобили и една образовна установа.

Американскиот претседател Доналд Трамп на 11 октомври објави дека Русија и Украина се договориле за „енергетско примирје“ во војната што трае четири и пол години, но не ги соопшти деталите од договорот. По неговата изјава, Киев пријави нови руски напади врз енергетски објекти.

— реклама —

Украина пред три дена потврди дека ги продолжила нападите врз руската нафтена инфраструктура по тридневна пауза. Претходно, украинската влада тврдеше дека го почитува примирјето.

Украинскиот претседател Володимир Зеленски изрази незадоволство поради продолжените руски напади врз енергетската инфраструктура, обвинувајќи ја Москва дека го игнорира барањето на Трамп двете страни да ги прекинат ваквите напади.

— реклама —

Зеленски денеска на платформата Икс објави дека во неделата по најавата на Трамп за енергетско примирје, Русија извршила 76 напади врз украинскиот енергетски, нафтен и гасен сектор. Тој додаде дека во текот на изминатата ноќ биле нападнати објекти во четири украински региони, поради што десетици илјади семејства останале без електрична енергија.

Според Зеленски, Русија се обидува да предизвика целосен прекин на снабдувањето со електрична енергија во Украина. Тој оцени дека Москва не покажува подготвеност за возвратни чекори и дека секоја можност за заработка ја толкува како поттик за продолжување на војната. Зеленски порача дека притисокот треба да биде насочен кон Русија за да се создадат услови за мир.

Во меѓувреме, Трамп вчера изјави дека сè уште не е познато каква одлука ќе донесе за натамошните санкции против Русија иако претходната вечер потпишал извршна уредба со која се укинуваат планираните ограничувања.

Како причина ја навел американската национална безбедност и интереси. „Сè ќе решиме, ќе дознаете. Но, ова е многу добра одлука, одлука што ќе биде добра за земјата, а верувам и за целиот свет“, изјави Трамп на донаторска вечера во својот имот на Флорида.