(Видео) Мицкоски за Алта банка: Не сум дилер, ниту сум продавал банка, се обидувам да ги спасам вработените

„Не седев настрана како воајер, да се самозадоволувам со маката на луѓето“, изјави премиерот Христијан Мицкоски на надзорната расправа во Собранието посветена на Алта банка, одговарајќи на обвинувањата за неговата улога во преземањето на Стопанска банка Битола.

Мицкоски ги отфрли тврдењата дека посредувал во продажбата на банката, нагласувајќи дека преземањето било реализирано преку купување акции од приватни акционери, а не од државата.

„Имено, Алта банка Србија ја купува Стопанска банка Битола од приватни акционери, не од државата, од приватни акционери и сопственици на акции“, рече премиерот.

— реклама —

Тој објасни дека во периодот на локалните избори во 2025 година Владата не можела да им дава насоки на јавните претпријатија и државните акционерски друштва за тоа како да постапуваат со акциите што ги поседувале во Стопанска банка Битола.

Според неговото објаснување, дури по завршувањето на изборите и откако Алта банка од Србија веќе станала квалификуван мнозински сопственик, Владата препорачала управните одбори на јавните претпријатија и акционерските друштва да одлучат што ќе прават со своите акции.

„Што е неколку месеци потоа, откако во службен весник е објавена одлуката дека господинот Давор Мацура, односно Алта банка Србија, станува квалификуван мнозински сопственик на Стопанска банка Битола“, посочи Мицкоски.

Тој ги отфрли и обвинувањата поврзани со неговата комуникација со гувернерот на Народната банка, Трајко Славески.

— реклама —

„Нормално е, логично е, кога ќе се случи една аквизиција на една банка, претседателот на владата да дознае од Народната банка, да не дознава од медиуми“, изјави премиерот.

Според него, ваквата комуникација е дел од нормалното функционирање на институциите, а спротивното би значело дека системот функционира стихијно.

Мицкоски реагираше и на квалификациите што, како што рече, биле упатувани кон него во изминатите денови.

— реклама —

„Што се однесува до нашиот разговор со гувернерот Трајко Славевски, исто така и тоа што го слушам во медиумите е невистина, нема да го спуштам нивото на дискусија на она коешто го слушам изминативе денови, дека сум бил дилер, идиот, aрамја или што сè не си наслушав за себе“, рече Мицкоски.

Тој нагласи дека како премиер смета оти има обврска да бара решение за проблемите што се појавуваат во државата, наместо да остане настрана.

„Јас имам легитимитет од отприлика 450.000 граѓани коишто на последните парламентарни избори ја дадоа довербата на коалицијата којашто ја предводам“, рече Мицкоски, осврнувајќи се на прашањата во кое својство се вклучил во случајот.

Потоа ја спореди својата улога со однесувањето за време на енергетската криза, кога, според него, и како опозициски политичар нудел помош.

— реклама —

„Не седев на страна како воајер, да се самозадоволувам со маката на луѓето, туку напротив, влегувам во процес во којшто ќе најдам решение и ќе ги спасам најпрвин оние вработени коишто се во самата банка, а потоа и оние доверители коишто, се разбира, се наоѓаат таму“, изјави Мицкоски.

Премиерот остана на ставот дека неговото вклучување во случајот е насочено кон решавање на проблемот со банката и заштита на вработените и доверителите, додека обвинувањата за неговата улога во преземањето ги оцени како политички спинови и груби невистини.