„Сакам да му го честитам роденденот на мојот починат син, да видат обвинетите како ние ги прославуваме ‘најсреќните’ денови“, рече пред судницата Мита Тасева, мајка на загинатиот диџеј Стефан Тасев, додека траеше судењето за трагедијата во дискотеката „Пулс“ во Кочани.
Неколку моменти подоцна, со подеднакво тешки зборови кажа и Драги Стојанов, татко на загинатиот Андреј Стојанов.
„Утре е роденден на ова златно, прекрасно дете. Ако контролираа, утре немаше на гробови да славам роденден“, рече Стојанов, обраќајќи се кон обвинетите.
Двајцата родители неделава требало да ги слават родендените на своите деца. Наместо тоа, тие во судница ги слушаа прашањата на обвинетиот градежен инспектор Николчо Боцев, кој повеќе од три часа се обидуваше да го оспори градежното вештачење за објектот во кој загинаа 63 лица, а повеќе од 200 беа повредени.
Боцев поставуваше прашања на тројцата вештаци кои го изработиле наодот и се обидуваше да покаже дека во вештачењето не е наведен по име и презиме како виновен. Вештакот и професор Горан Марковски, сепак, остана на ставот дека пренамената на објектот, реорганизацијата на просторот, промените на електричната, водоводната и канализациската инсталација, како и вградувањето несоодветни материјали директно влијаеле врз исполнувањето на основните барања за безбедност на дискотеката.
„Согласно Законот за градење, надлежните органи морало да реагираат на незаконските зафати, но таквата реакција изостанала сè до 16 и 18 март 2025 година“, посочи Марковски.
Според него, градежниот инспектор имал право и обврска да побара објектот да биде вратен во првобитна состојба.
Вештакот Марковски му укажа на Боцев дека веќе повеќепати одговара на исти прашања и повтори дека стои зад наодот оти во „Пулс“ имало незаконска пренамена, промени на инсталациите и материјали со кои била нарушена безбедноста.
Според изнесеното во судницата, инспекциска контрола во периодот од 2012 година до трагедијата немало, а двајца инспектори излегле на терен дури по несреќата.
Токму тоа дополнително го зголеми револтот кај родителите.
„Ако доказите покажат дека опасностите им биле познати, а не презеле ништо, тогаш не зборуваме за институционален пропуст, туку за свесно непостапување и степенот на одговорност. Одговорноста не се избегнува со бескрајно испрашување на вештаците“, рече Тасева.
Стојанов, пак, рече дека за него никакво оправдување не може да биде поважно од животот на неговото дете.
„Парите им беа поважни. Зарем парите се поважни од животот на моето дете? Ако им требаа пари, да се обратеше, кредит ќе земев, куќата ќе ја продадев, само да ми го оставеше детето“, рече тој.
Во трагедијата во „Пулс“ загинаа 63 лица, а повеќе од 200 беа повредени. Судењето продолжува, а судот треба да ја утврди индивидуалната кривична одговорност на секој од обвинетите врз основа на доказите и вештачењата.
