(Видео) Наместо оставка, Славески го заташкува скандалот со Алта банка, вели Димитријевиќ

Генералниот секретар на СДСМ, Александар Саша Димитријевиќ, го обвини гувернерот на Народната банка, Трајко Славески, дека наместо да преземе одговорност за случајот со „Алта банка“, носи одлуки со кои, според него, се прикриваат пропустите во работењето на институцијата.

На прес-конференција, Димитријевиќ посочи дека привремениот администратор на банката, Илија Андоновски, претходно бил вклучен во процесот на одобрување на нејзиното влегување на македонскиот пазар. Како што наведе, Андоновски ги издал лиценците за акционерите и членовите на Управниот и Надзорниот одбор, откако била дадена дозволата за работа на банката.

— реклама —

Според Димитријевиќ, Андоновски од мај 2025 година бил директор на Дирекцијата за вонтеренска супервизија и лиценцирање, поради што неговото назначување за привремен администратор претставува судир на интереси и може да ја попречи проверката на претходните постапки на Народната банка.

— реклама —

„Не може човек што бил дел од процесот за одобрување на Алта банка да влезе во Македонија сега да биде на оваа позиција“, рече Димитријевиќ, поставувајќи прашања за можноста од прикривање докази и избегнување одговорност.

Тој потсети дека СДСМ, како што рече, уште пред 11 месеци предупредувала за банката, но Славески ги отфрлал нивните забелешки и уверувал дека состојбата е во ред.

— реклама —

Димитријевиќ ја оспори и најавената продажба на банката на нов сопственик во рок од 10 дена. Според него, сомнежите за потеклото на капиталот и истрагите во Србија, Црна Гора и Европската Унија би можеле да ги одвратат потенцијалните купувачи.

— реклама —

Сите обвинувања и оценки ги изнесе Димитријевиќ на прес-конференцијата.