(Видео) Напад на иранско гасно поле ја крена цената на нафтата на 110 долари

Цените на нафтата на светските пазари силно осцилираат поради ескалацијата на конфликтот на Блискиот Исток. Откако претходно паднаа поради договор меѓу Ирак и Турција за продолжување на извозот, тие нагло пораснаа по извештаите за напад врз иранското гасно поле Јужен Парс, пренесува Гардијан.

Цената на нафтата се приближи до 110 долари за барел, додека поскапе и гасот, откако Иран соопшти дека американско-израелски воздушен напад погодил дел од неговата енергетска инфраструктура. Ова е прв напад врз иранското производство на фосилни горива од почетокот на конфликтот.

— реклама —

Иранските медиуми јавија дека биле погодени постројки на огромното поле Јужен Парс, кое Техеран го управува заедно со Катар. Дел од петрохемиските капацитети биле исклучени за да се спречи ширење на пожар.

— реклама —

Како одговор, Иранска револуционерна гарда се закани со напади врз енергетски објекти во Саудиска Арабија, Обединети Арапски Емирати и Катар, што дополнително ја зголеми загриженоста за снабдувањето со енергенси.

— реклама —

Референтната цена на нафтата Брент порасна за околу 5 проценти, додека европскиот гас поскапе за повеќе од 7,5 проценти. Неизвесноста е засилена и од проблемите во Ормускиот теснец, клучна рута за транспорт на нафта.

Во обид да ги намали цените, САД привремено го суспендираа Џоунс акт, дозволувајќи транспорт на стоки меѓу американските пристаништа и со бродови под странско знаме во наредните 60 дена.

Во меѓувреме, Банка на Канада предупреди дека конфликтот ја зголемува нестабилноста на глобалните пазари и носи ризици за економскиот раст.

И покрај алтернативните рути, како обновениот извоз на нафта од Ирак преку Турција, аналитичарите предупредуваат дека долготраен конфликт може да доведе до недостиг и дополнителен раст на цените.