Напнато беше денеска во Хаг по изрекувањето на пресудите за Хашим Тачи и тројцата поранешни команданти на УЧК. Поддржувачи на обвинетите се собраа на плоштадот Маливелд, каде што протестираа против одлуката на Специјализираните совети на Косово.
Според извештаите од местото, дел од демонстрантите се судриле со полицијата, а повеќе лица биле уапсени. Снимките покажуваат зголемено полициско присуство и инциденти меѓу демонстрантите и безбедносните сили.
Протестите се одржуваат во близина на институциите каде што се водеше судскиот процес против Тачи, Кадри Весели, Реџеп Селими и Јакуп Красниќи. Холандските власти претходно ги засилија безбедносните мерки поради најавените демонстрации.
Тензиите се зголемија веднаш по објавувањето на пресудите. Тачи беше осуден на 25 години затвор, додека Весели, Селими и Красниќи исто така беа прогласени за виновни и добија затворски казни.
Четворицата беа прогласени за виновни за воени злосторства, меѓу кои убиства, незаконско лишување од слобода, тортура и сурово постапување. За делот од обвинението што се однесува на злосторства против човештвото, тие беа ослободени поради недостиг на докази.
Во Хаг пристигнаа голем број поддржувачи на поранешните лидери на УЧК од Косово и од дијаспората. Тачи и останатите обвинети и натаму имаат значителна поддршка во Косово, а нивните приврзаници ја сметаат пресудата за неправда кон поранешната УЧК.
Илјадници луѓе протестираа и во Приштина, каде што беа истакнувани знамиња и симболи на УЧК.
