(Видео) Невреме со поројни дождови во Шпанија: Загина маж, патиштата се претворија во реки

Едно лице загина во силното невреме што ги зафати подрачјата околу Барселона и Валенсија на шпанскиот средоземноморски брег, предизвикувајќи поплави, прекин во сообраќајот и откажани летови.

Мажот бил однесен од надојдената вода заедно со автомобилот додека се обидувал да помине преку мал поток во близина на Оливела, југозападно од Барселона. Неговото тело било пронајдено неколку часа подоцна од спасувачките екипи. Според шпанскиот весник „Ла Вангардија“, станувало збор за британски државјанин кој живеел во тој регион.

— реклама —

Во средата, во подрачјето околу Барселона за само неколку часа наврнале до 80 литри дожд на квадратен метар. Уште пообилни врнежи имало во Валенсија и околината, каде што биле измерени до 100 литри на квадратен метар.

— реклама —

Поради невремето биле откажани летови, а локалниот сообраќај бил отежнат и во Барселона и во Валенсија. Патиштата во североисточниот дел на Шпанија биле претворени во надојдени водотеци, а поплавени биле и подруми.

Силниот ветер, со удари до 100 километри на час, корнел дрвја, а поради невремето била откажана и фудбалска средба од првата лига. Поплавени патишта имало и во регионот Мурсија.

— реклама —

Валенсија во октомври 2024 година беше погодена од едни од најтешките поплави во историјата на Шпанија, во кои загинаа најмалку 229 лица, а материјалната штета се проценуваше на милијарди евра.

— реклама —

Шпанската национална метеоролошка служба АЕМЕТ предупреди дека сè потоплото Средоземно Море, поврзано со климатските промени, може да придонесе за почести екстремни врнежи.