По повод 35 години од независноста на Македонија, низ повеќе градови во земјава ќе се одржи турнеја со учество на бројни македонски уметници и музичари, а дел од проектот е и актерот и музичар Игор Џамбазов.
Џамбазов истакна дека проектот ќе ги обедини и новите музички имиња и веќе докажаните уметници, со заедничка цел – достоинствено одбележување на Денот на независноста.
„Сите го прославуваме ова. Тоа е роденден на сите нас кои се чувствуваме како лојални граѓани на оваа држава“, рече Џамбазов.
Тој се осврна и на стиховите од песната „Македонија“ на Анте Поповски, оценувајќи дека токму оваа турнеја е можност да се покаже дека Македонија денес е препознатлива и надвор од своите граници.
„Ова е вистинска шанса да покажеме дека не само што ѕвездите шепотат на македонски, туку и дека светот сè повеќе дознава која е Македонија“, нагласи Џамбазов.
Во рамките на програмата, како што најави, ќе бидат претставени и некои од најзначајните достигнувања на државата во спортот, културата и уметноста, потсетувајќи на моменти кои оставиле траен белег во колективната меморија.
Џамбазов изрази задоволство што по подолг период повторно ќе има можност за заеднички настапи и дружење меѓу уметниците, додавајќи дека ваквите средби можат да бидат поттик за создавање нови проекти.
„Сигурен сум дека градовите кои ќе ги посетиме долго ќе ги паметат овие настани, а од ова дружење ќе произлезат и нови идеи и соработки“, порача Џамбазов.
Турнејата, која е поддржана од Владата, ќе опфати 14 до 15 градови низ државата.
