Вицепремиерот и министер за транспорт, Александар Николоски информираше дека изградбата на железничката делница Бељаковце – Крива Паланка, како дел од Коридорот 8 кон Бугарија, претставува еден од најсложените и најамбициозни инфраструктурни проекти во поновата македонска историја.
Според него, на оваа делница се градат мостови со столбови високи до 61 метар, што, како што посочи, е повисоко од многу повеќекатници во урбаните средини.
„На делницата Бељаковце – Крива Паланка се градат мостови со столбови високи до 61 метар – повисоки од повеќекатници во урбана средина. Во изградбата ќе бидат вградени десетици илјади тони железо и 125.000 кубни метри бетон. Ова не е само железница, ова е инженерско чудо и доказ дека Македонија е способна за големи подвизи“, истакна Николоски.
Тој нагласи дека проектот е доказ за капацитетот на државата да реализира комплексни градежни зафати од стратешко значење, кои ќе придонесат за подобра регионална поврзаност и економски развој.
Железничката делница Бељаковце – Крива Паланка е дел од источниот крак на Коридорот 8, кој треба да ја поврзе Македонија со Бугарија и да овозможи побрз транспорт на патници и стоки меѓу двете земји и поширокиот регион.
