Министерот за транспорт Александар Николоски соопшти дека е завршена реконструкцијата на железничката обиколница на Скопје, односно делницата Драчево–Илинден, со што се создаваат услови товарниот железнички сообраќај да се одвива надвор од главниот град.
Според Николоски, обновената пруга ќе овозможи побрз карго-превоз по Коридорот 10, како и подобра организација на железничкиот транспорт.
„По оваа делница ќе сообраќаат исклучиво товарни возови, што ќе придонесе за поефикасен транспорт и подобро функционирање на железничкиот сообраќај“, истакна Николоски.
Тој нагласи дека проектот има и значајни еколошки придобивки, бидејќи товарните композиции повеќе нема да минуваат низ Скопје, што ќе придонесе за намалување на загадувањето и подобрување на квалитетот на воздухот во главниот град.
