Американската војска соопшти дека погодила три нафтени танкери поврзани со Иран, откако биле истрелани балистички ракети кон два американски воени брода во регионот.
Американската Централна команда (CENTCOM) соопшти дека еден од танкерите, кој се наоѓал во близина на островот Харг, бил „трајно онеспособен“, како и вториот танкер во близина на Ормускиот Теснец. Третиот танкер, кој се наоѓал во Оманскиот Залив, бил „целосно уништен“.
Од CENTCOM наведуваат и дека американските сили успешно избегнале повеќе напади на Иранската револуционерна гарда (IRGC), насочени кон американски носач на авиони и разурнувач со наведувани ракети. Во нападите, според американската страна, нема повредени американски војници.
Иранските државни медиуми претходно објавија дека еден ирански танкер бил погоден во близина на островот Харг. Техеран засега не ги потврдил нападите врз американските воени бродови.
Командантот на CENTCOM, адмиралот Бред Купер, испратил директна порака до Иранската револуционерна гарда.
„Нека пораката до IRGC биде јасна: ако стрелате кон два наши брода, ќе наметнеме уште поголема економска цена со уништување на три ваши танкери. Нема да се двоумиме да ги браниме американските сили и, доколку е потребно, да ја уништиме ограничената и ранлива иранска флота на нафтени танкери“, рекол Купер.
Според CENTCOM, трите ирански танкери биле дел од „мрежа која го финансира IRGC и неговите регионални сојузници“.
Новата ескалација доаѓа речиси една недела по повторното избивање на судирите меѓу САД и Иран, по период на релативно затишје. Претходно истече 60-дневниот прекин на огнот, а засега нема значителни сигнали дека би можел да биде постигнат нов дипломатски договор.
Судирот дополнително ги зголеми цените на енергентите на светските пазари, а затворањето на Ормускиот Теснец за поморскиот сообраќај создаде дополнителен притисок врз снабдувањето со нафта.
