Прашањето за тоа како Македонија треба да изгради доверба со Бугарија, која не ги признава македонскиот јазик и идентитет, беше во фокусот на денешната прес-конференција на еврокомесарката за проширување Марта Кос.
Новинарката Лепа Џундева посочи дека Кос и денеска, како и вчера, повторува дека Европската Унија функционира врз доверба и праша како таа доверба може да се изгради со земја членка која не ги признава јазикот и идентитетот, потсетувајќи и на унилатералната изјава доставена за време на првата меѓувладина конференција. Таа побара одговор и дали во такви околности не се оправдани барањата за дополнителни гаранции.
Во одговорот, Кос рече дека Европската Унија токму на довербата ја изградила својата основа, но призна дека не постои универзален рецепт како таа се создава.
„Драго ми е што го поставивте прашањето за довербата, затоа што на тоа е изградена Европската Унија. Кога започна, таа не започна како политичка заедница, туку како заедница на челик. Тоа не беше добра политика на меѓусебни односи. Но она што го ценам, зборувам навистина за сериозното минато во доцните педесетти од минатиот век, бидејќи довербата меѓу претходните непријатели, како Германија и Франција, произлезе од довербата дека ќе ја градат заедно структурата, нешто подобро отколку да се борат меѓу себе“, рече Кос.
Таа нагласи дека не може да дава совети како Македонија да ја изгради довербата со соседите, но посочи дека колку е поголема довербата, толку полесно се одвива пристапниот процес.
„Да, се согласувам со вас, довербата е важна, но како ќе ја изградиме довербата? Нема рецепти за тоа. Јас не сум онаа која може да ви дава совети за тоа како да изградите доверба со вашите соседи. Но она што го знам е дека колку повеќе доверба имате, толку полесно ќе напредувате низ пристапниот процес.“
Кос посочи дека довербата не се создава со декларативни пораки, туку со конкретни постапки, почитување на меѓународното право и соработка.
„Она што сакам да го кажам е, како можеме да ја изградиме довербата? Можеме да ја изградиме довербата не само со добри зборови, туку и со добри дела. Може да градиме доверба со избегнување дејства и зборови што може да зголемуваат тензии, може да ја зголемиме довербата кога ќе го почитуваме меѓународното право, ќе ги решаваме споровите по мирен пат, може да градиме доверба преку соработка на заеднички прашања.“
Таа додаде дека градењето доверба не се однесува само на една земја членка, туку на односите со сите 27 членки на Европската Унија.
„Градењето доверба е поддршка на регионалната стабилност, и градењето доверба не се однесува само на една земја членка, туку градењето доверба е да се изгради доверба со сите дваесет и седум земји членки“, изјави Кос.
