Тензии и остри реакции од опозицијата ја одбележаа вчерашната седница на Советот на Град Скопје, откако советниците на Левица со свирежи го пречекаа градоначалникот Орце Ѓорѓиевски, изразувајќи незадоволство од новиот начин на поставување и одговарање на советничките прашања.
Новиот модел предвидува прашањата да се поставуваат групно, а градоначалникот потоа групно да одговара на нив. Овој начин на работа не е прифатен од опозицијата, особено од советниците на Левица, кои и на претходната седница реагираа, а овојпат протестираа со свирежи и бучава.
Ѓорѓиевски на реакциите одговори со насмевка и продолжи со одговарање на поставените прашања. Во текот на одговорите двапати побара од претседателот на Советот, Даме Димитровски, да се погрижи за, како што го нарече, „хорот Ветер и магла“.
Свирењето и тропањето продолжија околу шест минути, по што советниците на Левица ја напуштија седницата. Во текот на реакциите, Ѓорѓиевски им порача дека земаат над 40 илјади денари за да свират еднаш месечно.
Дополнителни реакции предизвика и видеопреносот од седницата. Според Левица, преносот не го опфатил делот во кој советниците ги поставувале прашањата, туку започнал директно со одговорите на Ѓорѓиевски.
Од партијата велат дека во снимката не е достапен ниту делот во кој советниците реагирале на начинот на водење на седницата и барале враќање на директната дебата. Според нив, ваквиот формат им оневозможува на советниците веднаш да реагираат доколку одговорот на градоначалникот е нецелосен или не ја опфаќа суштината на прашањето.
Од Левица остро го критикуваа начинот на кој се одвивала седницата, оценувајќи дека наместо директен дијалог со советниците, градоначалникот избрал долги политички одговори и реакции на критиките.
„Советничките прашања, меѓутоа, не постојат за градоначалникот да добие резервиран термин за политички говор. Тие постојат токму за обратното – избраните претставници на граѓаните да можат да бараат отчет од него и од институциите со кои раководи“, наведоа од партијата.
Од Левица дополнително посочија дека Советот на Град Скопје има 45 избрани членови кои ги претставуваат граѓаните и дека, според нив, тие треба да имаат можност за директна дебата и поставување дополнителни прашања.
