Патниците на летот од Бали до Мелбурн неодамна доживеале непријатно искуство кога кабината на авионот се исполнила со густа магла, создавајќи сцена што многумина ја опишале како дел од хорор-филм. Инцидентот се случил на лет на авиокомпанијата „Џетстар“, а снимката брзо станала вирална на социјалните мрежи.
Тиктокерката Жизел, позната под профилот „џизелинмоушн“, патувала од аеродромот Денпасар на Бали кон Мелбурн, кога летот, според нејзините зборови, се претворил во „почеток на хорор-филм“.
Пред самото полетување, кондензацијата од системот за климатизација станала толку густа што патниците едвај гледале неколку реда пред себе.
На виралната снимка се гледаат збунети патници кои се обидуваат да ги прилагодат вентилациските отвори над седиштата, но без успех.
„Нешто ми кажува дека климата во авионот работи со полна сила“, напишала Жизел во описот на видеото.
Подоцна објаснила дека е нормално во авионите понекогаш да се создаде кондензација поради големата разлика во температурата меѓу кабината и надворешниот воздух.
Сепак, истакнала дека ситуацијата на нејзиниот лет била „прилично луда“.
„Сите околу мене не можеа да видат подалеку од два или три реда пред себе“, раскажала таа, додавајќи дека маглата останала во кабината додека авионот чекал да полета.
Во изјава за „Јаху лајфстајл“, Жизел рекла дека маглата била видлива уште при влегувањето во авионот, но состојбата постепено се влошувала.
„Беше така уште од качувањето, но стануваше сè погусто, до степен што речиси ништо не можевме да видиме“, изјавила таа.
Иако сцената вознемирила дел од патниците, кабинскиот екипаж неколкупати ги уверувал дека маглата е безопасна и дека станува збор за нормална појава поврзана со системот за ладење.
„Да бидам фер кон екипажот, неколкупати објавија дека станува збор само за климатизацијата за да ги смират луѓето“, објаснила Жизел.
Необичната снимка предизвикала лавина реакции на интернет, од паника до шеги.
„Јас би избегала што подалеку од тој авион, ова е застрашувачки“, напишала една корисничка.
Друг се пошегувал со авиокомпанијата: „Класичен Џетстар. Зошто луѓето воопшто летаат со нив?“
Имало и такви што не биле загрижени.
„Бидете среќни што климата воопшто работела. Сум бил на многу летови каде што не ја вклучуваат додека авионот не почне да се движи“, напишал еден патник.
Друг корисник додал: „Ова е сосема нормално во тропски подрачја.“
Некои патници, сепак, тврделе дека никогаш не виделе толку густа магла во авион.
„Летам повеќе од 30 години и никогаш не сум видел вакво нешто. Малку магла – да, но не и да биде густа како супа“, напишал еден од коментаторите.
Иако изгледа драматично, експертите објаснуваат дека ова е безопасна и вообичаена појава, особено во тропските клими.
Наглите промени на температурата и влажноста можат брзо да предизвикаат кондензација на влагата во кабината, особено кога жешкиот воздух од пистата ќе се судри со ладниот воздух од климатизацијата додека авионот мирува.
Вообичаено, маглата исчезнува неколку минути по полетувањето или кога температурата во кабината ќе се стабилизира.
