(Видео) Пожарот во Шпанија однесе уште еден живот: Десетмина сè уште се исчезнати

Бројот на загинати во катастрофалниот шумски пожар во шпанската покраина Алмерија се искачи на 13, откако почина 93-годишна британска државјанка, која беше тешко повредена во огнената стихија.

Жената, која претходно имала здравствени проблеми, минатиот петок била хоспитализирана со тешки изгореници на околу 20 проценти од телото. Таа била една од осумтемина повредени кои биле згрижени во болница, од кои четворица се здобиле со сериозни повреди.

— реклама —

Регионалниот министер за вонредни состојби, Антонио Санц, изрази сочувство до семејствата на сите загинати. Пожарот избувна во четврток во областа Лос Гаљардос и зафати повеќе од 7.000 хектари вегетација.

— реклама —

Во меѓувреме, шпанските власти продолжуваат со потрагата по исчезнатите лица. Засега официјално не е потврден идентитетот на ниту една од жртвите, а форензичките служби соопштија дека бројот на пријавени исчезнати се зголемил на десет.

Потрагата се спроведува во соработка со властите од Велика Британија, Франција и Белгија, со цел членовите на семејствата во тие земји да можат да пријават исчезнати лица и да достават ДНК-примероци. Според надлежните, постои можност дел од исчезнатите да се меѓу загинатите, а се претпоставува дека повеќето жртви се британски и белгиски државјани.

— реклама —

Меѓу идентификуваните жртви е белгискиот бизнисмен Станислас Вердонкт. Неговиот син тврди дека неговиот татко не бил навреме предупреден за опасноста и дека не добил препорака да остане во својот дом.

Во меѓувреме, претседателот на регионалната влада на Андалузија, Хуанма Морено, соопшти дека пожарот е ставен под контрола и дека неговото понатамошно ширење е запрено. На повеќе од 1.000 евакуирани жители им е дозволено да се вратат во своите домови, додека шпанскиот премиер Педро Санчез денеска треба да ги посети погодените подрачја.

View this post on Instagram