Претседателката Гордана Сиљановска-Давкова престојуваше во Галичник, каде ја поддржа иницијативата за обновување и одржлив развој на селото, а се приклучи и на традиционалното оро.
Таа порача дека зачувувањето на Галичник не претставува само грижа за минатото, туку и создавање основа за идните генерации.
„Зачувувањето на Галичник не е само грижа за минатото, туку создавање цврста и инспиративна основа за новите генерации, потврдувајќи дека традицијата и развојот можат успешно да се надополнуваат и да чекорат рака под рака“, истакна претседателката.
Претходно, во Галичник беше промовирана иницијативата на Месната заедница Галичник за обновување и ставање во функција на повеќе објекти од историско, културно и општествено значење. Пред дипломатскиот кор, претставници на меѓународни организации, бизнис секторот и локалната самоуправа, иницијативата ја презентираа претставниците на месната заедница предводени од претседателот Огнен Караѓозовски.
Во рамки на посетата, гостите ги разгледаа традиционалната галичка куќа „Филиповска“, црквата „Св. Петар и Павле“, каде беше претставено значењето на Галичката свадба како една од најпрепознатливите македонски културни манифестации, како и куќата на Ѓорѓија Пулевски и црквата „Св. Петка“.
Галичник останува еден од најсилните симболи на македонскиот културен идентитет, место каде традицијата живее преку архитектурата, обичаите, песните и сеќавањата што се пренесуваат од генерација на генерација.
