По 45. пат, семејствата на жртвите од трагичниот пожар во дискотеката „Пулс“ денеска маршираа низ Кочани, барајќи правда, вистина и одговорност за смртта на нивните најблиски.
Маршот за ангелите започна во 18:05 часот од Паркот на Револуцијата, а учесниците повторно испратија порака до институциите дека очекуваат целосно расветлување на случајот и утврдување на одговорноста.
Пред полициската станица во Кочани се обрати Розета Џамова, сестра на едно од починатите момчиња, која порача дека суштинското прашање не е што се случувало по избувнувањето на пожарот, туку дали сите надлежни навреме и совесно ги извршувале своите законски обврски.
„Со секоја должност доаѓаат обврски. Со секое овластување – одговорност. Со секоја униформа – очекувања дека ќе се постапува професионално, навремено и еднакво кон сите. Прашањето е дали секој што имал службени обврски и законски овластувања ги извршувал така како што се очекува од една институција“, рече Џамова.
Таа посочи дека во судските постапки голем дел од вниманието било насочено кон временски детали и комуникации меѓу службите, додека, како што рече, во втор план останала суштината на трагедијата.
„Во еден момент остана впечаток дека најголемата трагедија не е што 63 луѓе не се вратија дома, туку што часовникот не бил прецизен“, истакна Џамова.
Пред Основниот суд во Кочани се обрати и Александар Наунов, претседател на Здружението на граѓани „16 Март 2025 Кочани“, кој нагласи дека семејствата не бараат пресуди без докази, туку темелна и правична постапка.
„Никој не бара улицата да суди. Но ако обемот на доказите е проблем, тогаш прашањето не е зошто ги има толку многу, туку како системот со години дозволувал да се натрупуваат неправилности и пропусти“, рече Наунов.
На денешниот марш присуствуваа и претставници на Сојузот на борците од Народноослободителната борба од Скопје, кои дадоа поддршка на семејствата на загинатите.
По завршувањето на маршот, учесниците засадија млади садници кај спортската сала на ООУ „Никола Карев“, во меморијалниот простор наречен „Кочански ангели“, посветен на жртвите од трагедијата.
