Најмалку едно лице загина, а 21 се водат како исчезнати по уривање на зграда во изградба на Филипините, соопштија локалните власти.
Несреќата се случила во градот Анџелес, северно од Манила, по што филипинските власти започнале истрага за причините за уривањето на повеќекатницата.
Спасувачките екипи и натаму ги пребаруваат урнатините, составени од бетонски плочи и искривен челик. Во потрагата се користат кучиња трагачи, уреди за откривање срцеви отчукувања и тешка механизација.
Властите соопштија дека загинал 65-годишен државјанин на Малезија, чие тело било пронајдено во соседен хотел што исто така бил оштетен од уривањето.
Од регионалното биро за противпожарна заштита изјавија дека е потврдено оти најмалку пет лица се затрупани под урнатините.
„Двајца од нив комуницираат со спасувачите, додека состојбата на останатите засега не е позната“, изјави Марија Леа Саџили на прес-конференција.
Спасувачките операции продолжуваат, но властите предупредија дека потрагата ќе биде значително потешка во текот на ноќта.
