Луксузниот хотел „Бурџ Ал Араб“ во Дубаи ќе биде затворен поради голема реконструкција која ќе трае околу 18 месеци, изјавил член на персоналот на хотелот. Станува збор за прва обнова од неговото отворање во 1999 година, во период кога туризмот во регионот е забавен поради конфликтот меѓу САД и Израел со Иран.
Во соопштение на сопственикот, хотелската група „Џумеира“, се наведува дека работите ќе се изведуваат во фази и ќе ги води парискиот архитект на ентериери Тристан Оер. Сепак, не е прецизирано дали објектот целосно ќе биде затворен за време на реконструкцијата. Персонал од хотелот информирал дека на гостите со веќе направени резервации ќе им биде понудено алтернативно сместување во блиски хотели, а периодот на затворање може да биде променлив.
Хотелот во форма на едро, една од најпрепознатливите знаменитости на Дубаи, претрпел штета кога остатоци од пресретнат ирански напад со дрон ја погодиле неговата фасада на почетокот на март. Од „Џумеира“ велат дека планираната обнова не е поврзана со тој инцидент.
Сепак, тајмингот на реконструкцијата доаѓа во период кога конфликтот веќе влијае врз патувањата во Дубаи, со нарушувања на летовите во Обединетите Арапски Емирати и предупредувања од луксузни компании за пад на побарувачката и притисок врз профитот.
