На денешната прес-конференција, Кети Штерјова обвини дека Владата предводена од Христијан Мицкоски спроведува политики што, според опозициската партија, ја оддалечуваат земјата од европската интеграција и отвораат простор за поголемо влијание на Кина и Русија.
Штерјова оцени дека министерот Иван Стоилковиќ отворено промовира соработка со Кина и ги застапува, како што рече, интересите на странски држави.
„Се потврдува она што го говори СДСМ – Иван Стоилковиќ, соработник на Мицкоски и министер во неговата влада, работи за кинеската и руската агенда“, рече Штерјова.
Од СДСМ посочија дека по кредитот од една милијарда евра, за кој тврдат дека е обезбеден со кинески средства преку Унгарија, сега се најавуваат и други стратешки инвестиции и проекти со кинеско финансирање.
Штерјова оцени дека ваквата политика е спротивна на стратешките интереси на Македонија и ја поврза со предупредувањата од САД за влијанието на Кина и Русија во Западен Балкан.
Таа воедно ја критикуваше и улогата на одредени медиуми, наведувајќи дека, според СДСМ, дополнително се зголемува влијанието на српските и унгарските медиумски структури во земјата.
„Ништо не е случајно. Ова е свесна политика на Мицкоски и неговата криминална група – да ја држат Македонија далеку од ЕУ, во изолација, а поблиску до авторитарни сили и источни влијанија“, изјави Штерјова.
Од СДСМ порачаа дека граѓаните, наместо политика на изолација и приближување кон, како што ја нарекоа, источната сфера на влијание, заслужуваат јасна европска иднина.
