Три лица загинаа, а две се повредени во силна експлозија што најверојатно била предизвикана од истекување на гас, по што се урнала зграда во местото Порто Сант'Елпидио, во близина на италијанскиот град Анкона.
Двајцата повредени се пренесени во болницата „Торете“ во Анкона. На местото на несреќата веднаш пристигнале противпожарни екипи, итната медицинска помош и полициски служби, јави агенцијата АНСА.
Во несреќата животот го загубиле Џузепе Пјерони (47), кој бил пронајден мртов под урнатините, како и Еторина Пакапело (89), чие тело било извлечено по повеќечасовна потрага.
Нејзиниот 60-годишен син Романо Черкети им подлегнал на повредите во болницата во Анкона.
Во експлозијата се повредени и родителите на Џузепе Пјерони, кои биле хоспитализирани во Анкона.
Според првичните информации, причината за експлозијата најверојатно е истекување на гас, а надлежните служби спроведуваат истрага за целосно утврдување на околностите на трагедијата.
