Охрид синоќа беше домаќин на првиот од серијата концерти и настани со кои Македонија ја одбележува 35-годишнината од независноста. Со настапи на повеќе познати македонски музички имиња, од градскиот стадион започна прославата која во наредниот период ќе се одржува во 11 градови низ земјата.
Програмата се одвива под мотото „Силно светнал ден“, а кулминацијата е најавена за 8 септември во Скопје, каде што на Градскиот стадион ќе настапи светската музичка ѕвезда Дејвид Гета.
Спектаклот е во режија на Дејан Пројковски и е замислен како современо сценско патување низ музика, театар и поезија, со кое се раскажува приказната за македонската држава, нејзините успеси, загуби, пресврти и генерации.
Првиот концерт во Охрид донесе низа емотивни моменти, а публиката уживаше во изведби на познати македонски песни и композиции.
Меѓу нив беше и „Везилка“ од Блаже Конески, со која беше одбележано македонското културно наследство и јубилејот 35 години независност.
Џамбазов пред охридската публика ја изведе „Црно тиквешко“ од Владо Јаневски.
„Тажна љубов, среќна песна“ одекна на стадионот во изведба на Тамара Тодевска, која со својот настап придонесе за атмосферата на празничната вечер.
Публиката имаше можност да ја слушне и „Сонце за три света“ од Мики Јовановски-Џафер, во изведба на Ана Дурловски, а во духот на македонската традиција одекна и „О тешкото“.
Со својот најнов хит „Син на мама“ настапи Јанг дади, а Ружица од „Ареа“ заедно со публиката ја отпеа легендарната „Сите мои слики“.
Особено емотивна атмосфера создадоа „Некст Тајм“, кои заедно со публиката ја изведоа „Ја излези Ѓурѓо“, а во рамките на музичката програма беа испеани и песни од Тоше Проески.
Прославата за 35 години независна Македонија продолжува во следните недели низ 11 градови, со низа концерти и настани, а големата завршница ќе биде на 8 септември во Скопје со настапот на Дејвид Гета.
