(Видео) Шпанија првпат прогласи национална вонредна состојба поради шумските пожари

Шпанија првпат прогласи национална вонредна состојба поради големите шумски пожари што беснеат во повеќе делови од земјата, додека Франција побара помош од Европската Унија за справување со пожарите на атлантскиот брег. Високите температури и силниот ветер дополнително ја влошуваат состојбата и предизвикуваат нови евакуации низ Европа.

Во Шпанија повеќе од 10.000 жители се евакуирани од планинските подрачја западно од Мадрид, каде што пожарникарите се обидуваат да спречат спојување на неколку големи пожари. Министерот за внатрешни работи Фернандо Гранде-Марласка изјави дека националната вонредна состојба е прогласена поради сериозноста на пожарите, густата населеност на погодените подрачја и неповолните временски услови.

— реклама —

Шпанскиот премиер Педро Санчез оцени дека земјата се соочува со драматична ситуација, наведувајќи дека пожарите уништуваат илјадници хектари земјиште и загрозуваат бројни населени места. Властите предупредуваат дека пожарите во околината на Мадрид сè уште не се ставени под контрола.

— реклама —

Според шпанските власти, годинава избувнале повеќе од 29 големи шумски пожари, а изгорената површина е повеќекратно поголема во споредба со истиот период минатата година.

Во Франција, властите наредија целосна евакуација на полуостровот Кап Фере, една од најпосетените туристички дестинации во летниот период. Од подрачјето се евакуирани околу 63.000 луѓе, а дел од нив биле пренесени на безбедно со бродови. Голем пожар избувна и во близина на Бискарос, каде што жителите исто така беа принудени да ги напуштат своите домови.

— реклама —

Француските власти соопштија дека пожарот кај Кап Фере зафатил околу 10.000 хектари, при што изгореле 80 куќи, од кои околу 50 се целосно уништени.

Францускиот претседател Емануел Макрон соопшти дека побарал помош од Европската Унија за гаснење на пожарите, а во наредниот период се очекува пристигнување на специјализирани противпожарни авиони од неколку европски земји. Меѓу нив е и Хрватска, која испраќа авион „Канадер CL-415“ со две екипи за поддршка на операциите за гаснење.