(Видео) Тајфун го парализира Тајван: Еден загинат, 94 повредени и речиси 1.000 откажани летови

Едно лице загина, 94 се повредени, а речиси илјада авионски летови се откажани поради приближувањето на моќниот тајфун Чампи кон Тајван. Силните ветрови и обилните врнежи речиси целосно го парализираа секојдневниот живот на островот, каде што се затворени училиштата, институциите и голем број продавници, објави „Ројтерс“.

Иако тајфунот во меѓувреме ослабел, метеоролозите предупредуваат дека опасноста сè уште не е помината. Чампи претходно достигнал јачина на супертајфун и бил една од најсилните бури годинава во Тихиот Океан, со ветрови што достигнувале брзина до 191 километар на час.

— реклама —

Според тајванската метеоролошка управа, се очекува бурата да помине непосредно покрај североисточниот брег на островот, без директно да го погоди копното, а потоа да продолжи кон кинескиот брег и јужниот дел на Јапонија.

— реклама —

За жителите на крајбрежните градови се издадени предупредувања поради можни удари на ветер посилни од 150 километри на час. Надлежните ги повикаа граѓаните да останат во затворени простории и да избегнуваат непотребно движење.

Тајфунот има радиус од околу 320 километри, што значи дека неговото влијание може да опфати најголем дел од Тајван. Метеоролозите предупредуваат дека невремето би можело да трае два дена, а во одредени планински области во близина на Тајпеј се очекуваат врнежи што би можеле да достигнат и до еден метар.

Поради опасноста од поплави, свлечишта и силни ветрови, властите евакуирале речиси 1.300 жители од планинските подрачја.

— реклама —

Особено сериозни нарушувања има во воздушниот сообраќај. Тајванското Министерство за транспорт соопшти дека за петок се откажани сите 262 домашни летови, како и 717 меѓународни и регионални летови, односно вкупно 979.

Во поголем дел од островот се прекинати наставата и работата на институциите, додека службите за итни интервенции се во состојба на зголемена подготвеност.

Тајван редовно се соочува со тропски бури и има развиени системи за рано предупредување и евакуација, поради што бројот на жртви при вакви непогоди најчесто е релативно мал. Иако сезоната на тајфуни е најинтензивна во летните месеци, силни бури можат да го погодат островот и во текот на есента.