(Видео) Тензично, по „Информер“, демонстрантите се пред „Пинк“: Силен полициски кордон, кон зградата летале јајца

Тензиите на улиците во Белград продолжуваат и вечерва, еден ден по победата на Студентската листа на парламентарните избори во Србија. По упадот во редакцијата на „Информер“, група демонстранти се собрале и пред зградата на телевизијата „Пинк“ во населбата Дедиње, каде што се распоредени силни полициски сили, јавуваат српските медиуми.

Според „Телеграф“, пред телевизијата се собрани граѓани и припадници на локалните граѓански собранија кои ја поддржуваат Студентската листа. Полицијата формирала кордон пред влезот во објектот, а меѓу распоредените припадници има и полицајци опремени со штитови и опрема за разбивање демонстрации.

— реклама —

Како што пренесува Танјуг, дел од собраните граѓани фрлале јајца кон зградата на телевизијата, додека возачи кои минувале во близина ги поздравувале со автомобилските сирени.

Демонстрантите извикувале пароли пред објектот, а полицискиот кордон го спречувал нивното приближување до влезот.

— реклама —

Протестот пред „Пинк“ следува по инцидентот во редакцијата на „Информер“, каде што претходно вечерва група граѓани го пробила влезот и влегла во просториите. Според известувањето на „Телеграф“, таму дошло до туркање и оштетување на инвентарот, по што интервенирале надлежните служби.

— реклама —

Во меѓувреме, студентите во блокада јавно се оградија од упадите во медиуми и институции и ги повикаа граѓаните по прославата на изборната победа мирно да се разотидат.

„Не поддржуваме упади во медиуми и институции, ниту повикуваме на нив. Медиумите ќе ги ослободуваме во Собранието, преку институционална борба за слободно и професионално новинарство“, порачаа студентите.

Според последните информации наведени во извештајот на српскиот медиум, нема официјални податоци за повредени или приведени лица пред „Пинк“. Се наведува дека на местото пристигнувале дополнителни полициски сили и дека сообраќајот во тој дел од градот бил целосно запрен.