Најмалку 27 лица загинаа, а повеќе од 60 се повредени во пожар што избувнал во бар во населбата Чатучак во Бангкок, Тајланд. Осуммина од повредените се во критична состојба.
Пожарникарите биле повикани нешто по полноќ, а по пристигнувањето затекнале посетители кои во паника се обидувале да избегаат од објектот зафатен од пламен. На снимките објавени на социјалните мрежи се гледаат луѓе како врескаат и бегаат од барот, додека некои паѓаат во обид да се спасат.
Според сведоци, огнот избувнал во близина на сцената и за кратко време го зафатил целиот објект. Еден возач, кој случајно минувал покрај барот, изјавил дека ги искршил прозорците за да им помогне на две лица да се извлечат.
Друг сведок за агенцијата АФП раскажал дека успеал да спаси пет лица, додавајќи дека нивната облека горела додека излегувале од објектот.
Тајландскиот премиер Анутин Чарнвиракул изјави дека причините за пожарот сè уште се истражуваат. Според сведоштво на музичар кој настапувал во барот, пожарот започнал во близина на електричен прекинувач, по што брзо се проширил, а се слушнале и експлозии.
Премиерот посочи дека многумина, во обид да се спасат од чадот и пламенот, се засолниле во тоалетите на објектот, каде што подоцна биле пронајдени и најголем дел од жртвите.
Првичните резултати од истрагата покажуваат дека повеќето од загинатите најверојатно починале од вдишување чад. Сепак, надлежните велат дека конечните причини за смртта ќе бидат утврдени по дополнителните вештачења.
Пожарот бил локализиран за околу половина час, но зад себе оставил целосно уништен објект. Ова не е прв ваков инцидент во Тајланд, каде и покрај најавите за построги безбедносни стандарди, нивната примена често е недоволна.
