(Видео) Трамп: Луѓето што откриваат доверливи информации за воени операции треба да бидат стрелани

Американскиот претседател Доналд Трамп упати остра порака до лицата што на медиумите им откриваат доверливи информации за американските воени операции, изјавувајќи дека тие треба да бидат стрелани. За време на предизборен митинг во Аризона, тој особено го критикуваше непознатото лице за кое тврди дека им го открило на новинарите времето на американските напади врз нуклеарните објекти на Иран во јуни 2025 година.

„Според мене, оние што откриваат информации треба да бидат стрелани. Тие треба да бидат стрелани. Во старите времиња ги стрелавме оние што откриваат информации, знаете, кога ќе дознаеја во кое време ќе нападнете земја“, рече Трамп.

— реклама —

Тој додаде дека воените напади се преземаат од одбранбени причини, за да се спречи противникот да се здобие со оружје способно да убие милиони луѓе одеднаш. Притоа, повторно се осврна на нападите врз иранските нуклеарни објекти и го критикуваше лицето за кое тврди дека го открило времето на планираната операција.

Трамп ја продолжува засилената предизборна кампања во пресрет на среднорочните избори во САД, со посети на Аризона и Монтана во текот на оваа недела. Во меѓувреме, политичката борба во Њујорк се интензивира, додека анкетите покажуваат дека зголемените трошоци за живот се меѓу главните грижи на американските граѓани, објави „Фокс њуз“.

— реклама —

За време на посетата на Монтана, Трамп најави дека Пентагон ќе воспостави нова локација за тестирање на напредно оружје и воени технологии. Тој ја опиша како „супер тест-локација“, наменета за развој и испитување на нови воени капацитети.

„Токму тука во Монтана, Министерството за војна ќе воспостави нова супер тест-локација за напредно оружје и технологија“, изјави Трамп пред присутните.

Како што посочи, меѓу технологиите што ќе се тестираат се потенцијално автономно оружје, вселенски технологии, системи за електронско војување, како и суперсонично и хиперсонично оружје. Според него, новата локација ќе придонесе американската војска да ја задржи својата воена супериорност.

— реклама —

Неговиот говор во Монтана беше прекинат и од демонстрант од публиката. Инцидентот предизвика реакција кај претседателот, кој го оцени прекинот како несоодветен.

„Тоа не е убаво. Кој е тој човек?“, праша Трамп, по што дел од присутните почнаа да свиркаат, а потоа да скандираат „Трамп! Трамп! Трамп!“.

Слични инциденти се случија и на други митинзи во последните недели. Во понеделникот, на собир во Охајо, поддржувач на Трамп удрил демонстрантка која носела маица со натпис „Објавете ги документите на Епстин“. По инцидентот, Трамп се потсмеваше на нејзината телесна тежина.