(Видео) „Во буџетот недостигаат 900 милиони евра – Мицкоски прави ребаланс за пополнување дупки“, вели Филипче

Претседателот на СДСМ, Венко Филипче, обвини дека во буџетот недостигаат 900 милиони евра, а дополнителна милијарда евра недостасува за исплата на пензиите. Според него, вториот ребаланс на буџетот е доказ за лошото управување со јавните финансии од страна на Владата на Христијан Мицкоски.

— реклама —

Филипче предупреди дека се отвора прашањето од кои извори ќе се обезбедуваат средства за исплата на платите и пензиите во наредниот период. Тој оцени дека со ребалансот не се обезбедуваат повисоки плати и подобар животен стандард, туку се кратат капиталните инвестиции и се создава простор за ново задолжување.

Според него, со јулскиот ребаланс буџетскиот дефицит бил зголемен за околу седум милијарди денари, со образложение дека средствата ќе бидат наменети за капитални инвестиции. Сега, како што посочи, инвестициите се намалуваат, но зголемениот дефицит останува.

— реклама —

Филипче рече и дека Владата ја намалува проекцијата на приходите за 5,3 милијарди денари, од 379,5 на околу 374 милијарди денари. Тој предупреди дека јавниот долг, заедно со долговите на јавните претпријатија, би можел да достигне 12 милијарди евра.

— реклама —

Според неговите тврдења, за две и пол години вкупниот долг на државата се зголемил од осум на речиси 12 милијарди евра, без граѓаните да почувствуваат значително подобрување на животниот стандард.

Филипче најави дека СДСМ ќе поднесе амандмани за зголемување на минималната плата, повеќе средства за младите, повисок студентски оброк и поголема поддршка за земјоделците. Тој ја повика власта да ги поддржи предложените мерки.