(Видео) „Врие Шкотланѓани во Скопје“: Тевдовски бара ФФМ вечерва да ги отвори вратите бесплатно

Поранешниот министер за финансии Драган Тевдовски упати јавен апел до Фудбалската федерација на Македонија да овозможи бесплатен влез на Националната арена „Тодор Проески“ за вечерашниот натпревар меѓу Македонија и Шкотска.

Тевдовски реагира на цените на билетите и стравува дека големиот број шкотски навивачи кои пристигнаа во Скопје може да создадат атмосфера во која македонската репрезентација ќе се чувствува како да игра на гостински терен.

— реклама —

„ФФМ, отворете ги вратите и дозволете бесплатен влез вечер. Не може да има карти од 1.800 денари, а во шест натпревари пет шута на гол. Врие Шкотланѓани во Скопје!“, порача Тевдовски.

Тој бара Федерацијата дополнително да ги повика граѓаните да дојдат на стадионот и да обезбеди поголема организирана поддршка за македонските фудбалери.

„Не смее македонската репрезентација да игра на Градски во атмосфера како на гости. Тоа не го заслужуваат нашите херои Елмас, Барди и другите дечки кои ја победија Италија, Германија... и нè однесоа на првото Европско првенство“, напиша Тевдовски.

— реклама —

Тој упати апел и за организирано присуство на македонските навивачки групи.

„Замолете, повикајте ги луѓето да дојдат вечер на стадион. И организирајте навивачки групи да бидат таму, не смее Швајцарци, Шкотланѓани и други да бидат поорганизирани од нас кога дома игра македонската репрезентација“, порача Тевдовски.

— реклама —

Македонија вечерва од 20:45 часот ја пречекува Шкотска на Националната арена „Тодор Проески“ во Скопје, во рамките на Лигата на нации.

View this post on Instagram

Апелот на Тевдовски доаѓа откако и во изминатите денови имаше реакции за ценовната политика на ФФМ и стравувања дека голем број места на арената ќе останат празни.

— реклама —

Пред натпреварот со Швајцарија, ФФМ објави цени од 500 до 1.800 денари во зависност од блокот и местото на трибините, додека ВИП-влезниците чинеа 3.000 денари.

Тевдовски сега бара, наместо празни седишта, ФФМ да ги отвори вратите и македонската репрезентација вечерва да добие што е можно поголема поддршка од трибините.