(Видео) Зеленски: Руски дронови погодиле турски брод во Црното Море, загинал капетанот

Двајца членови на екипажот загинале, а 11 се спасени по пожарот што избувнал на товарен брод во Црното Море, во близина на романските територијални води. Бродот подоцна потонал.

Романските власти засега не го наведуваат причинителот на пожарот. Украинскиот претседател Володимир Зеленски, пак, тврди дека бродот бил погоден од руски беспилотни летала.

— реклама —

Романското Министерство за внатрешни работи соопшти дека спасените членови на екипажот биле извлечени од бродот, кој потоа потонал. Националната поморска управа објави дека станува збор за бродот „Rojad Mamadov“.

Зеленски изјави дека пожарот бил предизвикан од руски дронови и дека бродот превезувал пченка. Според него, станувало збор за цивилен брод во сопственост на Турција, на кој имало државјани на Азербејџан и Индија.

„Страшен напад на два руски беспилотни летала врз цивилен брод во неутрални води“, напиша Зеленски.

— реклама —

Тој наведе дека меѓу загинатите е и капетанот на бродот, додека судбината на уште едно лице се утврдувала. Од 11 спасени членови на екипажот, едно лице било повредено.

— реклама —

Руските власти засега не го коментирале инцидентот. Во претходно соопштение на руското Министерство за одбрана било наведено дека Русија погодила два товарни брода.

Романските медиуми објавија дека инцидентот се случил во близина на нафтена платформа со која управува романската енергетска компанија „OMV Petrom“.

Бродот пловел под знамето на Свети Китс и Невис кон Равена во Италија. Според податоците на VesselFinder, последното пристаниште во кое се закотвил било украинското пристаниште Измаил.

Романија, која е членка на НАТО, дели 614 километри копнена граница со Украина. Од почетокот на војната регистрирани се случаи на влегување на руски беспилотни летала во романскиот воздушен простор, како и појава на пловечки мини во Црното Море.