Градоначалникот на Скопје, Орце Ѓорѓиевски, на денешната прес-конференција реагираше на паниката која во текот на денот се создава меѓу граѓаните поради информациите за наводна контаминација на скопската вода.
Тој посочи дека добил повеќе од 200 пораки од вознемирени скопјани и порача дека станува збор за прашање кое, како што нагласи, не смее да биде предмет на политички пресметки.
„Имам повеќе од 200 пораки од вознемирени наши сограѓани. Уште еднаш сакам да им порачам дека ова не е политика“, рече Ѓорѓиевски.
Градоначалникот најави остар одговор од надлежните институции кон оние кои, според него, намерно шират непроверени информации и создаваат паника.
„Вчера имаше во 12:30 по полноќ една госпоѓа која што во 30 групи од утринава ја имаме детектирано дека има споделувано и тоа е приватен профил на една госпоѓа припадничка на една опозициска политичка партија“, рече Ѓорѓиевски
Тој посочи дека последиците од ширењето на ваквите информации веќе се чувствуваат и меѓу граѓаните, кои почнале масовно да купуваат вода во маркетите.
„Да правите хистерија, да се прави хаос во маркетите, да купуваат луѓето вода, како не знам каква криза да се случува со градот Скопје, а нашето јавно претпријатие ги решава проблемите – тоа нема да го дозволиме“, порача Ѓорѓиевски.
Тој воедно нагласи дека ЈП „Водовод и канализација“ врши редовни испитувања на водата, а лабораторијата на претпријатието, според него, активно помага и во други градови.
Како пример го посочи Гостивар, каде што, како што рече, лабораторијата во изминатиот период извршила околу 300 анализи.
„Ние помагаме други градови да се справат со проблемите, а некој вештачки да создава и креира криза во градот Скопје – не дозволуваме“, истакна градоначалникот.
