(Видео) Жестоки судири на студентските протести во Албанија, кон полицијата летале цигли

Студентските протести во Тирана ескалираа во судири со полицијата, откако демонстрантите со цигли и парчиња бетон ја гаѓале зградата на Министерството за образование. Полицијата возвратила со солзавец и водени топови, а неколку лица биле приведени, пренесува Ројтерс.

Организаторите велат дека студентите протестираат поради лошите услови на факултетите, високите школарини и недоволната финансиска поддршка. Меѓу причините за незадоволството се и ограничените можности за вработување по завршувањето на студиите.

— реклама —

Дел од демонстрантите, покрај образовните проблеми, изразуваат незадоволство и од општествената нееднаквост и работата на владата.

„На Албанија ѝ треба револуција, промена и целосно уривање на системот, бидејќи вака повеќе не може“, изјавила демонстрантката Лулјета Кола. Таа додала дека во земјата постои длабока социјална неправда и голем јаз меѓу богатите и сиромашните.

— реклама —

Заменичката на албанскиот премиер, Албана Кочиу, преку објава на Фејсбук порача дека насилството не е решение.

„Фрлањето камења, нападите врз институциите и државната полиција, како и бесмисленото уништување јавен имот, не се начин на кој младите треба да го изразуваат своето незадоволство“, напишала Кочиу.

— реклама —

Протестите во Албанија се случуваат во период кога слични активности организираат студенти и ученици и во други европски земји.

Во Франција, средношколци веќе со недели протестираат и блокираат училишта. Тие бараат повеќе наставници и подобра инфраструктура, посочувајќи дека дотраените училишни згради и преполните училници влијаат врз квалитетот на наставата.