Вирусот на Западен Нил се шири во Србија: 53 заболени, дури 49 со невроинвазивна форма на болеста

Во Србија од почетокот на сезоната на надзор на вирусот на Западен Нил се регистрирани 53 случаи на заболување, од кои дури 49 се со невроинвазивна форма на болеста, соопшти Институтот за јавно здравје на Србија „Д-р Милан Јовановиќ Батут“.

Според податоците за периодот од 1 јуни до 27 септември 2026 година, случаите се регистрирани во 11 окрузи. Најмногу има во Белград – 20, потоа во Јужнобачкиот округ со девет и Шумадискиот со шест случаи.

— реклама —

Меѓу заболените има 32 мажи и 21 жена, а просечната возраст е 65,1 година.

— реклама —

Треската од Западен Нил е сезонско заболување кое се пренесува преку убод од заразен комарец. Главен преносител е комарецот „Culex pipiens“, кој е присутен и во Србија. Сезоната на пренос вообичаено трае од јуни до ноември.

Од Батут препорачуваат заштита од убоди од комарци преку употреба на репеленти, носење облека со долги ракави и ногавици и избегнување престој на отворено во самрак и во зори, кога активноста на комарците е најголема.

— реклама —

Се препорачува и користење заштитни мрежи на прозорците и вратите, како и редовно отстранување на застоена вода од саксии, садови, канти, буриња и други предмети во кои комарците можат да положат јајца.

— реклама —

Според податоците за Европа, од почетокот на сезоната на пренос во 2026 година до 23 септември биле идентификувани 175 подрачја погодени од вирусот на Западен Нил во 14 европски земји.

Од Батут советуваат лицата кај кои ќе се појават симптоми што можат да укажуваат на невроинвазивна форма на болеста веднаш да се јават кај лекар.