ВЛТ терминалите останале во магацин, се чекало одобрение од УЈП и Министерството за финансии за нивна употреба, сведочеше директор од Државна лотарија

На продолжението на судењето за случајот „Лотарија“, во кој меѓу обвинетите се поранешниот вицепремиер Артан Груби и ексдиректорот на Државна лотарија Перпарим Бајрами, сведочеше Александар Андонов, директор на Секторот за спречување перење пари и финансирање тероризам во Државна лотарија.

Андонов, кој по професија е правник и во Лотарија работи од 2017 година, пред судот кажа дека бил член на Комисијата за спроведување на постапката за набавка на ВЛТ терминали. Тој објасни дека комисијата имала шест члена, поделени во две групи – едната за проверка на документацијата, а другата за проверка на техничките услови на терминалите.

Сведокот посочи дека по објавувањето на документацијата на Бирото за јавни набавки била спроведена управна контрола поради високата вредност на набавката. По завршувањето на контролата бил изготвен записник, по што продолжила реализацијата на набавката.

— реклама —

На прашањето дали ВЛТ терминалите биле ставени во употреба, Андонов одговори дека тие никогаш не биле користени за потребите на Државна лотарија.

„Да, познато ми е што се случи со овие ВЛТ терминали. Тие никогаш не беа ставени во употреба за потребите на Државна лотарија“, сведочеше Андонов.

— реклама —

Тој објасни дека од надлежниот сектор биле доставувани барања до Управата за јавни приходи и Министерството за финансии за нивно пуштање во употреба, но дека терминалите останале во магацините на Државна лотарија.

На прашањето зошто не биле ставени во употреба, Андонов рече дека не може да даде одговор бидејќи одлуките за пуштање во употреба ги носеле надлежните институции.

За време на сведочењето, Груби го праша Андонов дали му било познато дека финансискиот план бил разгледан на владина седница четири месеци пред донесувањето на одлуката. Сведокот одговори дека не знае кога била одржана седницата, кој претседавал со неа и кој бил владин состав во тој период.

— реклама —

Тој појасни дека Државна лотарија преку системот „е-Влада“ го доставувала финансискиот план за разгледување, но дека не знае како понатаму се одвивала постапката во Владата.

Покрај Груби и Бајрами, на кого му се суди во отсуство, во предметот се обвинети и Методија Димевски, Скендер Мехмети, Бојан Јанев, Фатмир Рамадановски, Александар Димитриоски и Башким Авдиу.

Обвинението се однесува на дејства преземени во текот на 2023 и 2024 година, за кои Обвинителството тврди дека биле пречекорени службените овластувања и била предизвикана штета на Државна лотарија во износ од 9,7 милиони евра.

Во предметот е опфатено и прашањето за самостојното приредување игри на среќа преку ВЛТ терминали. Според Обвинителството, Државна лотарија немала право самостојно да приредува електронски игри на среќа преку овие терминали, бидејќи тоа право било внесено како непаричен влог при основањето на заедничкото друштво „Државна видеолотарија на Република Македонија – КАСИНОС АУСТРИА“.

Обвинителството во текот на истрагата првично ги гонеше обвинетите за „проневера“, но делото подоцна било преквалификувано во „злоупотреба на службената положба“, откако истрагата не обезбедила доволно докази за првичното кривично дело.