ВМРО-ДПМНЕ обвини дека СДСМ, ДУИ и Левица се повлекле од претходно постигнатиот договор за измените на Изборниот законик и оценува дека нивната цел не е подобрување на изборните правила, туку блокирање на реформските процеси.
Од владејачката партија велат дека измените на Изборниот законик се подготвувале со месеци преку работна група и бројни состаноци, во кои активно учествувале претставници и на опозициските партии.
„Измените се градеа постепено со широк политички и партиски консензус. Опозициските партии даваа забелешки и конкретни предлози кои целосно беа прифатени од владејачкото мнозинство“, соопшти ВМРО-ДПМНЕ.
Од партијата тврдат дека кога дошло време измените да бидат потпишани и усвоени, СДСМ, ДУИ и Левица се повлекле од договореното.
„Тоа покажува дека политиката на овие партии никогаш не била државничка и во интерес на граѓаните, туку политика на противење, опструирање и блокирање на сè што е во корист на напредокот на државата“, наведуваат од ВМРО-ДПМНЕ.
Во соопштението се оценува дека вистинскиот проблем за опозициските партии не бил Изборниот законик, туку, како што тврдат од ВМРО-ДПМНЕ, тоа што не сакале да поддржат уште една реформска обврска.
„За СДСМ, Левица и ДУИ поважно е да создадат политичка криза во државата отколку Македонија да исполни уште една реформска обврска“, се наведува во реакцијата.
Од ВМРО-ДПМНЕ додаваат дека граѓаните, според нив, веќе ја препознале политиката на опозициските партии како политика на блокади и опструкции и оценуваат дека тоа ќе се одрази и на следните избори.
